Opus Deicca yanapacun llamcaipi, ayllu ucupi, tucui ima ruraipipas, Jesucristo tariita.

Allin llamcaicca Diosmanmi pusacun.

Llapam bautizasccacunam Jesucristo ccatiiman huaccyascca cancu, Evangeliota causasccancuman jina, runacuman reccsichinancupacc. Opus Dei unanchascca carcca Iglesia Catolicata evangelizaciompi yanapanampacc; cristianocuna, iñisccancuman jina, ima ruraipipas, tucui ima caipipas, llamcasccancuta santoyachispa causanancupacc.

Opus Deipa reccsichicuinincuna:

Diospa churin cai

“Diospa churin caicca, Opus Deipa espiritualnimpa chaupinmi”, nirccam unanchaccnin. Bautismomanta pacham cristianocca Diospa churinman tucupun. Cai yachachiimi cristianocunata callpanchan, Diospa churin casccancuta yachacuspancu chaiman jina causanancupacc: Diospa huaccaichacusccampi astahuan suyacunancupacc; Dioshuan, runamasinhuanpas allin sonccolla causanancupacc; runacunapa jatun dignidadninta yachaspa, huaccepanintincama canancupacc; jinaspapas cai teccsimuyuta, Diospa tucui unanchasccantapas, checcap cristiano cuyaihuan apanancupacc, jauca sonccolla, imatapas jatun cananta suyaspancu.

Sapa punchau causai

“Cai pachapi tucui ima cosascunapa chaupimpim santo-caiman ccespinanchis yachacun; Diosta, llapa runacunatapas servispa”, nirccam San Josemaría. Ayllupi, casarascca caipi, llamcaipi, ima ruraipipas, Jesucristohuan cusca causaimi, Paita ccatipaimi, runamasinchista cuyaspa, pacienciahuan, cumuicucc sonccohuan, llamcacc runa caihuan, pimampas tupaccninta ccospa, cusisccalla caspa; cristiano-cai, runa-cai virtudcunata ccespichispa.

Llamcaita santoyachii

Llamcaipi santo-runa caita mascaspacca, callpanam ima ruraitapas allinta ccespichinapacc; allin profesional jina, cristiano jina; Dios cuyana raicu, runacunata servina raicu. Chainapim, sapa punchau llamcasccanchis Cristohuan tupanapi ticracun.

Mañacuihuan ñacariihuan.

Opus Deipi medios de formacióncunam, ima ruraimantapas oración ashuan necesario cascccanta yachachinanpacc, chainallatacc penitencia ruraipas allin cristiano jina causanapacc. Prelaturapa runancunacca sapa punchaumi Santa Misaman rincu, Evangeliota juc ratu leincu, confesionmampas asuicuncum sapa cuti; Virgen Maria cuyaiitapas yachancutacc. Jesucristo jina canancupacctaccmi, uchui ñacariicunata chasquichincu; chaihuampas, ima ruraimantapas ashuan jatunmi quiquincupa obligacionnincuna ccespichii; chaicunata rurancu runacuna sumacc causaita apanancu raicu; chainallataccmi ayunotahuan, limosnatahuan chasquichicuncu.

Juc causailla apai.

Opus Dei unanchaccmi yachachircca cristianocunata manapuni “iscai causaita apanancupacc: juc partemantas canman vida interior, Dioshuan causai; jucmantatacc canman raquiscca causai apai. Chaisi canman ayllu ucupi juc causai, juctacc llamcaipi causai, juctacc runacunapa chaupimpi causai”. Ichacca, San Josemaría nircca: “juc vidallam canan, aichamanta espiritumanta rurascca, cai causaimi canan -almapi cuerpopipas- santa, Dioshuan juntascca causai”.

Libre runa cai

Opus Deipi runacunacca llaccta runacuna jinam cancu, chai raicum derechosnincu, obligacionincupas llapan runacunapa jinapunilla. Chaimi política ruraipi, economía ruraipi, cultura ruraipi, tucui imapipas, sapacama libremente, responsable jina imatapas rurancu; chaicunapi piensancupas manapunim Iglesiapa nitacc Opus Deipa sutimpichu. Sapacama libre cascan raicu, huaquincunapa piensasccancuta respetohuan ccahuancu.

Cuyai

Cristo reccsicc runacca jatun ccoritam taricun, ichacca manam quiquillampacc-chu chai ccorita huaccaichanan, huaquinmanmi reccsichinan. Cristianocca Jesucristopa testigon caspanmi, chai suyacuininta yachachinan, huillamunan huaquinman, ayllun ucupi, amigoncunapi, llamcacc masincunapi, allin causaita apaspa, rimarispapas. Nirccam unanchaccnin: “maquipura llamcasccanchis runacunata, amigocunata, aillunchiscunatapas yanapasun Cristoman chayanancupacc”. Cristota huaquin runaman reccsichispacca, llaccta runapa, huac-chacunapa ñacariinintan ccespichina, yanapana.