Opus Deipa yachachisccan espiritucca uchui iglesiacunata yanapanampaccmi, chai raicum runancunacca mai diocesis taricusccancupi huaquin cristianocuna jinapuni causancu.

Opus Deicca unanchacca carcca 1928 huatapim. 1941 huatapitaccmi Madrid llacctapi tiyacc Obispo aprobarcca; Santa Sedetaccñatacc 1947 huatapi. 1982 huatamanta pacham Iglesia Catolicapi prelatura personal nisccaman ticracurcca.

Concilio Vaticano II unancharcca prelaturas personalescunata, pastoral llamcaicuna teccsimuyupi ccespichiscca canampacc. Chai prelaturas personales nisccacca Iglesia Catolicapa estructura jerárquican ucumpim unanchascca carcca. Chai ucupim taricuncu laico runacuna, sacerdotecuna, prelaturapa mascasccanta juntachinancupacc, prelado niscca camachiccpa ucumpi taquiaspancu.

Opus Deipa rurainincca, llapanmantapas ashuan runancuna yachachiimi (formación de los fieles), sapacama -Iglesia ucupi, teccsimuyupi tariscusccancupi- tucui ima apostolado ruraipi, llapan runaman santo-caiman huaccyascca casccancuta yachachispancu.

Prelaturapi runacuna apostoladopi llamcaspancu -huaquin católico runacuna jina- Diospa graciamp, cristiano causaita jatallichincu, yanapancu parroquiacunata, iglesiacunatapas: chaihuanmi runacuna Cristo cuyaiman cutirimuncu, Eucaristiaman caccmanta asuicuncu, huaquin sacramentocunatapas astahuan chasquincu; Evangeliotapas mirachincu iñiimanta carunchascca runacunaman; chainallatacc huac-chacunata, mana imayocc runacunatapas yanapancu atrasomanta lloccsimunancupacc.

Opus Deipa apostoladoncca quiquin prelaturapa carisma chasquisccanman jinam ruracun: llamcaipi santo-caita mascanapacc, sapa punchau tucui ima ruraipipas, imainaña taricuipipas Jesucristopi causanapacc.

Opus Deipi autoridadcuna mascancu llapallan runancuna juc sonccolla obispocunahuan, sacerdotecunahuan, pi Iglesiapi camachicc-huampas, jauca caipi causanancutam. Chainallataccmi runancunaman reccsichincu diocesano obispocunapa, conferencia episcopalpa camachisccanman jina causanancupacc, sapa runa aillun ucupi, llamcasccan ucupipas.

Chaimantapas, Opus Dei mascan espiritupi causaitam, santo-caiman chayaitam, manataccmi chapucunchu politicapi (cai pachapi runacunapa rurainimpicca). Sapa runan chaicunatacca ruranancu quiquincupa soncconcupa camachisccanman jina.

Estatutos nisccan camachicuipim Opus Deipi runacunacca chai profesional causainincupi, chai doctrinas sociales, políticas nisccacunapipas, sapa cama libre cancu; ichacca doctrina católicapa ucumpi taquiaspancu, huaquin catolico runacuna jinapuni causancu. Prelaturapi camachicucc-cunacca manam pitapas yachachinchu, nitacc consejanchu imaina ñampi purinanta, nitacc iñinantapas; santo-cai mascaillatam yachachincu.