Opus Deiman yaicunapacc-cca comprometicunam chai medios de formacióncuna chasquiita, Iglesia Catolicapa yachachisccanta iñispa, chaimán jina causanapacc.

Pipas Opus Deiman yaicunampacc vocación sobrenatural, otacc Diospa huaccyasccanmi canan. Causaininta Dios mitaiman churaspa, runama masinman yachachinampacc; llamcasccancupi, tucui ima rurasccancupipas, santocaiman ccespinancupacc.

CHAI VOCACION SECULAR NISCCA

Opus Deiman yaicuspacca, jina caccllam can, huaquin runamasincuna jina, huaquin catolico runacuna jinalla. Caccllan quiquimpa diocesisninpi taquian; Iglesiapi maiccen pastoral llamcaimanpas, munasccan yachaicunata apaspa, ima profesiontapas apallanmantaccmi. Jinaspapas munasccan partido politicotamampas yaicullanmantaccmi.

Prelaturaman yaicunapacca ccellccanam juc contratota; ichacca manataccmi chaihuan religiosocunapa votos nisccan ruraichu (pobreza, castidad obediencia).

Opus Deiman yaicucc runacca ñaupacc vidallantam apan: jina llamcasccampi llamcan; llacctan ucupipas, vecinoncunahuampas caccllatacc causan, mana cai teccsimuyumanta aiccerispa. Opus Deipi vocacioncca yanapacun Dioshuan tucui ratu tupaitam, sapa punchau -huasipi, ñancunapi, chacrapi, maipipas- runacunaman Dioshuan causai suma-sumacc casccanta ccahuachinapacc.

Chai raicum Opus Dei yachachin runacunaman santo-caiman chayaita, runacunata yanapaspa sapa punchau uchui cosascuna ruraipi Dioshuan tincunapacc -llamcaipi, llaquipi, cusicuipi, onccoipi, illaipi, micuipi, ayllu ucupi. Huaquin católico runacuna jinam Opus Deipi runacunacca causancu vocacionincuta; chai casccancuta mana pacaspalla, nitacc yanccapas huairachispa, ichacca naturalmente. Vocacionincum -Dioshuan compremetiscca casccancu- recccsicun llamcasccancupi, doctrina cristianata yachachisccancupi, santo-cai mascasccancupi.

COMPROMISOCUNA

Opus Deipi runacunacca chasquincum medios de formación espiritual, doctrinal, apostólica, nisccacunata, atisccancuman jina (casado, soltero). Filosofía otacc Teología yachaicunacca Iglesia Catolicapa camachisccanman jinam.

Sapa runam apan plan de vida nisccata, Dioshuan causanan raicu, Santa Misapi, comuniompi, sapa cuti confesionman asuicuipi, Santa Biblia otacc juc espiritual librocuna leiipi, jinallatacc Santo Rosariota mañacuncu, jinaspapas oraciónta rurancu.

Tucui rurasccancupim cusiscca causaita apanancu -Diosman runamasincuman ccocusccancu raicu-, santa cruzta marccaricusccancu raicu. Cristopa runancuna casccancu raicutaccmi, huaquin muyuriccnin runaman ccochucuinincuta yachachincu. Cai responsabilidad apostólicam vocacionincupa sonccon, Opus Deipi taricusccancupa chaupin. Ichacca cai ruraicunatam ccespichincu sapa cama quiquincupa libre runa casccancu raicu.

OPUS DEIMAN YAICUNAPACC

Baustimo vocacióntam Opus Dei ñampi munacc runacuna causancu: Santo-caita mascastin, Iglesia Católicapa iñiinimpi, San Josemaríaman Diospa huillasccanman jina.

Pipas librementem Opus Deiman yaicun, sonccompi Diospa ccayasccanta yachacuspa, Opus Deipi autoridadcunapa chasquisccan.

Opus Deiman yaicunapacca mañacuna ccellccata ruraspam; soccta quilla ccepatam yachacun sichus chasquisccachus can icha manachus chaita. Juc huata ccepatam juc tiempopacc Prelaturaman yaicun, contratota huatan huatan ccellccaspa.

Derecho Canónico mañacun chai contrato ruranapacc 18 huatayocc otacc mayor runa caita, chai raicum Opus Deimancca yaicun pipas mayor de edad caspa. Temporal compromisopa ccepantam, pichcca huatapa ccepanta, 23 huatayucc-cuna -munaspancucca- huiñaipacc yaicuncuman.

Opus Deimi comprometicun Católica iñiipi, yachachisccampi, alli allinta taquiachinampacc; jinaspapas chai Prelaturapa sacerdotencuna pastoral yanapaita chasquichinampacc.

Opus Deiman yaicucctami comprometicun, Preladompa camachisccanman jina taquianampacc, chai ñampi purinampacc.

Chainallataccmi chai compromiso tucupun tiempo ripuruptin, otacc ñaupacctapas sichus quiquinmanta munaptincca, camachiccnin autoridahuan parlaspa. Chaina captincca chaillapim huañun sapacamapacc chai derechos y deberes nisccacuna.